26 август сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба шаҳру ноҳияҳои вилояти Хатлон аз ноҳияи Ёвон оғоз гардид.

Дар фурудгоҳи муваққатии ноҳияи Ёвон Пешвои миллат муҳтарам Эмомалӣ Раҳмонро роҳбарияти вилояти Хатлон, масъулони ноҳия ва намояндагони қишрҳои гуногуни ҷомеа бо самимият истиқбол гирифтанд.

Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Ёвон нахуст Майдони Парчами давлатӣ, Нишони давлатӣ ва муҷассамаи Шоҳ Исмоили Сомониро мавриди баҳрабардорӣ қарор доданд.

Ин маҷмааи муҳташами меъморӣ, ки бозгӯй аз таъриху тамаддун, давлатдории миллӣ ва дастовардҳои Тоҷикистони соҳибистиқлол мебошад, дар кӯчаи Мирзо Турсунзодаи шаҳраки Ёвон бунёд гардидааст.

Майдони рамзҳои давлатӣ ва муҷассамаи Шоҳ Исмоили Сомонӣ дар масоҳати 1,1 гектар ҷойгир шудааст.

Сутунпояи Парчами давлатӣ 56 метрро ташкил намуда, матоъи Парчам бо дарозии 15 ва паҳноии 7,5 метр парафшон шудааст.

Таҳкурсии иншоот аз сангҳои хорои ватанӣ бунёд ёфтааст.

Дар паҳлуи Парчами давлатӣ муҷассамаи Шоҳ Исмоили Сомонӣ қомат афрохта, ба ҳусни мавзеъ шукӯҳи бештар бахшидааст.

Баландии худи муҷассама 8 метр буда, бо таҳкурсӣ баландии умумии он ба 14 метр мерасад.

Истифодаи масолеҳи баландсифати ватанӣ ва маҳорати ҳайкалтарошони тоҷик ба муҷассама намои хос бахшида, онро ба як асари меъмории дорои мазмуни баланди таърихиву миллӣ табдил додааст.         

Гузоштани шер аз ду паҳлӯи муҷассама бозгӯй аз мардонагӣ, ҷасорат ва тавонмандии миллати тоҷик аст.

Рамзи дигари кишвари соҳибистиқлол ва давлатдории навини тоҷикон – Нишони давлатӣ бо баландии 22 метр сохта шудаааст.

Иншооти муҳташами меъморӣ ҳамчун рамзи давлатдорӣ, истиқлолу озодӣ, ваҳдати миллӣ ва эҳтирому арҷгузорӣ ба таъриху тамаддуни миллат хизмат намуда, дар таҳкими худшиносӣ ва ифтихору сарафарозӣ аз давлатдории навини тоҷикон аҳамияти хос дорад.

Имрӯз ин макон на танҳо симои ноҳияи Ёвонро дигаргун кардааст, балки метавонад ба як мактаби маънавии худшиносӣ ва ватандӯстии насли наврас табдил ёбад. Зеро ҳар як рамзи давлатӣ дар ин ҷо ба таърихи миллат, соҳибистиқлолӣ ва арзишҳои давлатдории миллӣ пайванд дорад.

Баробари ба истифода додани Майдони Парчами давлатӣ, Нишони давлатӣ ва муҷассамаи Шоҳ Исмоили Сомонӣ дар ноҳияи Ёвон як гӯшаи нави ободу зебо ва дорои аҳамияти миллӣ ба вуҷуд омад, ки аз ин пас барои баргузории чорабиниҳои сиёсиву фарҳангӣ, инчунин тамошову истироҳати сокинону меҳмонон хизмат хоҳад кард.

Муҳимтар аз ҳама, ин макон метавонад ба мавзеъе табдил ёбад, ки дар он эҳтиром ба Парчам, Нишони давлатӣ, таърихи давлатдории тоҷикон ва арзишҳои миллӣ дар қалби наслҳои нав боз ҳам устувор мегардад.

   

26 август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни сафари корӣ ба вилояти Хатлон дар шаҳри Левакант ба фаъолияти се коргоҳи нави истеҳсолии ҶДММ «Парки инноватсионии саноатию технологии шаҳри Левакант» оғоз бахшиданд.

Коргоҳҳои истеҳсоли ранги хатҳои уфуқии роҳ, ашёи хоми маводи шустушӯӣ ва мебели инноватсионӣ дар доираи тадбирҳои созандагӣ ба истиқболи 35-солагии Истиқлоли давлатии Ҷумҳурии Тоҷикистон бунёд гардида, намунаи амалии рушди истеҳсолоти ватанӣ, истифодаи технологияҳои муосир ва фароҳамсозии ҷойҳои нави корӣ ба ҳисоб мераванд.

Иншооти нави истеҳсолӣ дар масоҳати умумии 2,8 гектар қомат афрохта, корҳои сохтмонии онҳо аз моҳи октябри соли 2025 оғоз гардида буданд. Бо истифода аз таҷҳизоти муосир ва ҷалби мутахассисони соҳавӣ корҳо дар муҳлати муайяншуда ба анҷом расонида шуданд.

Дар рафти корҳои сохтмонӣ барои 100 нафар сокини маҳаллӣ ҷойҳои кори муваққатӣ фароҳам оварда шуда, пас аз ба фаъолият оғоз намудани коргоҳҳо 60 ҷойи кори доимӣ таъсис ёфт. Ин иқдом дар баробари рушди истеҳсолот ба беҳтар гардидани сатҳи зиндагии аҳолӣ ва фароҳам омадани имкониятҳои нави иқтисодӣ барои сокинони маҳаллӣ мусоидат мекунад.

Яке аз самтҳои муҳимми фаъолияти коргоҳҳои нав истеҳсоли ранги хокавӣ барои хатҳои уфуқии роҳҳои мошингард мебошад.

Пешвои миллат муҳтарам Эмомалӣ Раҳмон дар ҷараёни шиносоӣ бо фаъолияти коргоҳ ба раванди истеҳсолот, имкониятҳои техникии он ва сифати маҳсулот таваҷҷуҳи махсус зоҳир намуданд.

Ба роҳбари давлат муҳтарам Эмомалӣ Раҳмон иттилоъ дода шуд, ки иқтидори истеҳсолии ин коргоҳ дар як моҳ 15 тоннаро ташкил дода, он нахустин коргоҳи махсуси истеҳсоли ранги хатҳои уфуқии роҳҳои мошингард дар кишвар ба шумор меравад. Ашёи хом пурра аз дохили кишвар дастрас мегардад.

Пештар қисми зиёди ин гуна маҳсулот ва ашёи хом аз хориҷи кишвар ворид карда мешуд. Акнун истеҳсоли он дар дохили кишвар имкон медиҳад, ки талаботи соҳаи роҳсозӣ ба маҳсулоти ватанӣ таъмин гардида, вобастагӣ аз воридот коҳиш ёбад.

Муҳимтар аз ҳама, истифодаи рангҳои босифат барои аломатгузории уфуқии роҳҳо ба баланд бардоштани сатҳи бехатарии ҳаракат мусоидат мекунад. Хатҳои равшан ва ба таъсири омилҳои муҳити зист тобовар ба ронандагон ва дигар иштирокдорони ҳаракат, махсусан шабона ва дар шароити номусоиди обу ҳаво, барои дуруст муайян намудани самти ҳаракат кумак мерасонанд.

Дар коргоҳи дигари истеҳсолӣ ашёи хоми маводи шустушӯйӣ истеҳсол карда мешавад. Ба Сарвари давлат муҳтарам Эмомалӣ Раҳмон иттилоъ дода шуд, ки иқтидори истеҳсолии ин коргоҳ дар як моҳ 10 тоннаро ташкил дода, 70 фоизи хокаи он дар дохили кишвар истеҳсол мегардад.

Истеҳсоли ашёи хом дар дохили кишвар барои рушди корхонаҳои истеҳсолкунандаи собун ва дигар маводи шустушӯӣ замина фароҳам оварда, имконият медиҳад, ки қисми бештари маҳсулоти ниҳоӣ бо истифода аз ашёи хоми истеҳсоли ватанӣ ба бозор пешниҳод карда шавад.

Коргоҳи сеюм ба истеҳсоли мебели инноватсионӣ машғул буда, бо истифода аз дастгоҳу таҷҳизоти муосир маҳсулоти гуногуни мебелӣ истеҳсол мекунад.

Ба Пешвои миллат муҳтарам Эмомалӣ Раҳмон иттилоъ дода шуд, ки иқтидори истеҳсолии коргоҳ дар як моҳ 2000 метри мураббаъро ташкил медиҳад. Дар ин ҷо истеҳсоли намудҳои гуногуни ашёи рӯзгор, мизу курсӣ барои хона ва утоқҳои корӣ, ҷевонҳои хоб ва дигар маҳсулоти мебелӣ ба роҳ монда шудааст.

Истифодаи технологияҳои муосир дар истеҳсоли мебел имконият медиҳад, ки маҳсулот бо сифати баланд ва тарҳи замонавӣ омода карда шавад.

Маҳсулоти ҳарсе коргоҳ мутобиқ ба талаботи муосир истеҳсол шуда, ба таъмини бозори дохилӣ бо маҳсулоти ватанӣ ва коҳиш додани ҳаҷми воридоти молҳои монанд мусоидат менамояд.

Мавриди зикри хос аст, ки қаблан як қисми ашёи хоми барои истеҳсоли чунин маҳсулот зарурӣ аз хориҷи кишвар ворид карда мешуд. Акнун баъди ба фаъолият оғоз намудани коргоҳҳои нав имконият фароҳам омадааст, ки истеҳсоли як қатор ашёи хом ва маҳсулоти зарурӣ дар дохили кишвар ба роҳ монда шавад.

Пешвои миллат муҳтарам Эмомалӣ Раҳмон зимни шиносоӣ бо фаъолияти коргоҳҳо аз бахшҳои асосии истеҳсолӣ дидан намуда, ба раванди технологӣ, сифати маҳсулот, сатҳи омодагии мутахассисон ва имкониятҳои васеъ намудани иқтидори истеҳсолӣ таваҷҷуҳ зоҳир карданд.

Таъкид гардид, ки рушди саноати коркард, истифодаи технологияҳои муосир, афзоиши истеҳсоли маҳсулоти рақобатпазир ва таъмин намудани бозори дохилӣ бо маҳсулоти ватанӣ аз самтҳои муҳими сиёсати иқтисодии кишвар ба шумор меравад.

Дар идомаи сафари корӣ ба ноҳияи Данғара Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳаи Файзбахши деҳоти Сафобахши ноҳия бинои нави Маркази ташхисии минтақавии Агентии Тоҷикстандартро мавриди баҳрабардорӣ қарор доданд.

Иншооти мазкур дар доираи тадбирҳои созандагӣ ба истиқболи 35-солагии Истиқлоли давлатии Ҷумҳурии Тоҷикистон бо тарҳи муосири меъморӣ бунёд гардида, дар масоҳати 2 ҳазору 850 метри мураббаъ ҷойгир мебошад. Сохтмони он моҳи марти соли 2023 оғоз гардида, бо маблағгузории Агентии Тоҷикстандарт пурра ба анҷом расонида шудааст.

Бинои нави Маркази ташхисии минтақавӣ дар маҷмӯъ дорои 51 ҳуҷраи корӣ мебошад.

Бино, ҳамчунин, дорои толори барҳавои маҷлисӣ буда, барои гузаронидани чорабиниҳои гуногун бо 80 ҷойи нишаст муҷаҳҳаз гардонида шудааст.

Иншоот бо техникаву технологияҳои муосир ва таҷҳизоти зарурии ташхисиву озмоишӣ таъмин гардида, дар он барои фаъолияти самараноки кормандон ва дар сатҳи баланд ба роҳ мондани хизматрасонӣ ба субъектҳои хоҷагидор шароити зарурӣ фароҳам оварда шудааст.

Зимни шиносоӣ ба Пешвои миллат муҳтарам Эмомалӣ Раҳмон иттилоъ дода шуд, ки марказ хусусияти минтақавӣ дошта, хизматрасониҳои ташхисӣ, озмоишӣ ва метрологиро барои ноҳияҳои Данғара, Балҷувон, Темурмалик ва шаҳри Норак анҷом медиҳад.

Фаъолияти марказ ба баланд бардоштани сатҳу сифати хизматрасониҳои соҳавӣ, ҳимояи ҳуқуқи истеъмолкунандагон ва таъмини бехатарии молу маҳсулот равона гардидааст.

Дар бино як қатор озмоишгоҳҳои махсус фаъолият менамоянд, ки бо таҷҳизоти муосири техникӣ ва озмоишӣ таъмин буда, имконият медиҳанд, ки ташхису санҷиши молу маҳсулоти гуногун дар сатҳи зарурӣ анҷом дода шуда, нишондиҳандаҳои сифат ва бехатарии онҳо муайян карда шаванд.

Дар марказ мутахассисони соҳибтаҷриба ва дорои донишу малакаи касбӣ фаъолият намуда, бо истифода аз имкониятҳои фароҳамгардида ба субъектҳои хоҷагидор ва аҳолӣ хизматҳои босифату саривақтӣ пешниҳод менамоянд.

Президенти Ҷумҳурии Тоҷикистон муҳтарам Эмомалӣ Раҳмон зимни шиносоӣ бо имкониятҳои иншооти нав ба фаъолияти Марказ баҳои баланд дода, ба масъулон ҷиҳати истифодаи самараноки таҷҳизоти муосир, такмили минбаъдаи хизматрасониҳои ташхисӣ, озмоишӣ ва метрологӣ, баланд бардоштани сифати хизматрасонӣ ва иҷрои саривақтии вазифаҳои соҳавӣ дастуру супоришҳои мушаххас доданд.