Дар Паёми навбатии худ ба Маҷлиси Олии Ҷумҳурии Тоҷикистон аз 16 декабри соли 2025, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаи рушди устувори иқтисоди миллӣ таваҷҷуҳи махсус зоҳир намуда, таъкид карданд, ки пешрафти давлат ва беҳтар гардидани сатҳи зиндагии мардум пеш аз ҳама ба рушди иқтисодиёт вобаста мебошад. Дар ин замина, таъмини афзоиши иқтисод, дастгирии соҳибкорӣ ва зиёд намудани ҷойҳои нави корӣ аз самтҳои афзалиятноки сиёсати иқтисодии кишвар муайян гардид.

Мақсад аз таъкид намудани рушди устувори иқтисоди миллӣ пеш аз ҳама таъмин намудани пешрафти устувор ва дарозмуддати иқтисодиёти кишвар мебошад. Яъне иқтисод бояд бо истифода аз имкониятҳои дохилӣ, ҷалби сармоягузорӣ ва татбиқи ислоҳоти иқтисодӣ пайваста рушд карда, барои пешрафти тамоми бахшҳои ҷомеа замина фароҳам оварад. Ин раванд ба таҳкими иқтидори истеҳсолӣ, рушди инфрасохтор ва баланд бардоштани рақобатпазирии иқтисоди миллӣ мусоидат менамояд.

Дар ин самт соҳибкорӣ ҳамчун яке аз муҳаррикҳои асосии иқтисодиёт арзёбӣ мегардад. Соҳибкорон бо таъсиси корхонаҳо, истеҳсоли маҳсулоти гуногун ва рушди хизматрасониҳо дар пешрафти иқтисоди кишвар нақши муҳим доранд. Аз ин рӯ, давлат барои дастгирии соҳибкорӣ, содда намудани расмиёти иқтисодӣ, беҳтар намудани фазои сармоягузорӣ ва фароҳам овардани шароити мусоид барои фаъолияти соҳибкорон тадбирҳои пайваста меандешад.

Ҳамзамон, яке аз ҳадафҳои муҳими рушди иқтисодӣ таъмини аҳолӣ бо ҷойҳои нави корӣ мебошад. Бо таъсиси корхонаҳои нав ва рушди бахшҳои гуногуни иқтисодиёт имкониятҳои шуғли аҳолӣ васеъ мегарданд. Ин раванд махсусан барои ҷавонон аҳамияти муҳим дошта, ба баланд гардидани сатҳи даромад ва беҳтар шудани шароити зиндагии мардум мусоидат мекунад.

Дар ин раванд саҳми сохторҳои давлатӣ ва муассисаҳои соҳавӣ низ муҳим мебошад. Аз ҷумла, фаъолияти самараноки корхонаҳои соҳаи авиатсияи гражданӣ ва хизматрасониҳои аэронавигатсионӣ барои рушди робитаҳои иқтисодӣ, густариши ҳамкориҳои байналмилалӣ ва рушди бахши сайёҳӣ мусоидат менамояд. Дар ин замина, саҳми Корхонаи воҳиди давлатии “Тоҷикаэронавигатсия” дар таъмини бехатарӣ ва танзими ҳаракати ҳавопаймоҳо дар фазои ҳавоии кишвар барои рушди устувори иқтисоди миллӣ аҳамияти муҳим дорад.

Бо ин роҳ, татбиқи ҳадафҳои дар Паём муайяншуда ба рушди минбаъдаи иқтисодиёти кишвар, таҳкими иқтидори миллӣ ва беҳтар гардидани сатҳи зиндагии шаҳрвандон мусоидат хоҳад кард. Рушди устувори иқтисодӣ замина фароҳам меорад, ки Ҷумҳурии Тоҷикистон дар оянда низ бо қадамҳои устувор ба сӯи пешрафт ва ободонӣ ҳаракат намояд.

   Ҳасанзода Эътибор

мутахассиси пешбари Маркази матбуоти КВД “Тоҷикаэронавигатсия”