Бо мақсади мутобиқ гардонидани низоми бехатарии авиатсионӣ дар фурудгоҳҳои Ҷумҳурии Қазоқистон, нигоҳдории ашёҳои аз мусофирон мусодирашуда, ки ҳамлу нақли онҳо бо ҳавопаймо манъ аст, қатъ гардид. Аз ин баъд чунин ашёҳо баъд аз ошкорсозӣ дар ҷараёни санҷиш фавран нобуд карда мешаванд. Ба ин хотир, аз ҳамаи мусофирон хоҳиш карда шудааст, ки пеш аз парвоз бо қоидаҳои интиқоли бағоҷ ва бағоҷи дастӣ бодиққат шинос шаванд, то аз ҳолатҳои нохуш ҷилавгирӣ шавад.

Дар доираи чорабиниҳои профилактикӣ ба корҳои фаҳмондадиҳӣ оид ба қоидаҳои интиқоли бағоҷ ва борҳои дастӣ диққати махсус дода мешавад. Шиносоии пешакии мусофирон бо талаботи низоми бехатарии авиатсионӣ ба пешгирии мусодираи ашёи мамнӯъ ҳангоми назорат мусоидат намуда, раванди гузариши расмиёти бехатариро самаранок ва босуръат мегардонад.

 “Пешгирии воридшавии ашё ва моддаҳое, ки ба меъёрҳои бехатарии авиатсионӣ мутобиқ нестанд, барои таъмини амнияти парвозҳо ва фароҳам овардани муҳити орому бароҳат дар фурудгоҳҳо нақши муҳим мебозад”,- гуфта шудааст дар маълумоти расмӣ.

Ҳамзамон, тибқи талаботи бехатарии авиатсионӣ, маҳсулотҳое, ки бастабандии аслии корхонаи истеҳсолкунанда надоранд, барои интиқоли ҳавоӣ иҷозат дода намешаванд. Аз ҷумла, ин меъёр ба асал, мураббо, маҳсулоти ширӣ ва дигар навъҳои консерви хонагӣ дахл дорад. Чунин ашёҳо мусодира гардида, баъд аз санҷиши дахлдор нобуд карда мешаванд.

Маълумоти муфассал дар сомонаҳои ширкатҳои ҳавопаймоӣ ва фурудгоҳҳо дастрас гардида, инчунин дар мизҳои бақайдгирӣ ва гузаргоҳҳои бехатарии фурудгоҳҳо ҷойгир карда мешаванд.