26-уми августи соли 2025 дар шаҳри Остона Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо нишони эҳтиром ба таърих ва ваҳдату ягонагии мардуми Қазоқистон дар назди маҷмааи «Муҳофизони Ватан» гулчанбар гузоштанд. Дар ин хусус ба АМИТ «Ховар» аз Маҷлиси миллии Маҷлиси Олии Ҷумҳурии Тоҷикистон хабар доданд.

Дар маросими гулчанбаргузорӣ Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалиро муовини Раиси Сенати Парламенти Ҷумҳурии Қазоқистон ва дигар шахсони расмӣ ҳамроҳӣ намуданд.

    

Дар доираи сафари расмӣ дар Ҷумҳурии Қазоқистон Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Раиси Сенати Парламенти Ҷумҳурии Қазоқистон Маулен Ашимбаев мулоқот анҷом доданд. 

Зимни мулоқоти роҳбарони палатаҳои болоии парламентҳо ва музокироти васеъ бо иштироки ҳайатҳои парламентии Тоҷикистону Қазоқистон ҳолати кунунӣ ва дурнамои муносибатҳои дуҷониба, робитаҳои байнипарламентӣ, инчунин масоили мубрами рӯзномаи байналмилалӣ ва минтақавӣ мавриди баррасӣ қарор дода шуданд.

Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ барои даъват ҷиҳати анҷом додани сафари расмӣ ба Ҷумҳурии Қазоқистон ба Раиси Сенати Парламенти Ҷумҳурии Қазоқистон изҳори сипос карда, алоқамандии ҷониби Тоҷикистонро ба сатҳи баланди дӯстӣ ва ҳамкории бисёрҷониба бо Қазоқистон таъкид доштанд.

Ҷонибҳо аз тамоюли мусбати муносибатҳои стратегӣ ва ҳампаймонӣ байни Ҷумҳурии Тоҷикистон ва Ҷумҳурии Қазоқистон изҳори қаноатмандӣ намуда, саҳми боризи Сарони ду давлат муҳтарам Эмомалӣ Раҳмон ва Қосим-Жомарт Токаевро дар тақвияти ин раванд баланд арзёбӣ карданд.

Аҳамияти таърихии имзои Аҳднома дар бораи муносибатҳои ҳампаймонӣ байни Ҷумҳурии Тоҷикистон ва Ҷумҳурии Қазоқистон, ки дар таърихи ҳамкории ду давлат саҳифаи нав боз намуд, таъкид гардид.

Дар мулоқот робитаҳои байнипарламентӣ яке аз самтҳои калидии маҷмуи муносибатҳои байни ду давлат номида шуд.

Маҷлиси миллӣ ва Сенати Парламент ҳамкории мутақобили судмандро пайваста ва дар сатҳи сифатан баланд ба роҳ монда, дар таҳкими муносибатҳои боэътимод байни давлатҳо нақши рӯзафзун доранд.

Аз рушди муназзами муносибатҳои дуҷонибаи кишварҳо дар соҳаҳои сиёсӣ, тиҷоратию иқтисодӣ, фарҳангию гуманитарӣ, илмию техникӣ ва ҳарбию техникӣ изҳори қаноатмандӣ карда шуд.

Таваҷҷуҳи ҷонибҳо ба густариши пайвастаи ҳамкории тиҷоратию иқтисодӣ ва сармоягузорӣ зоҳир гардид.

Бахшҳои саноати кӯҳӣ, саноати сабук, хӯрокворӣ ва кимиё, металлургияи ранга, дорусозӣ, мошинсозӣ, кишоварзӣ, энергетика, нақлиёт ва коммуникатсия самтҳои афзалиятноки ҳамкории иқтисодии Тоҷикистон ва Қазоқистон номида шуданд.

Рақамикунонии иқтисодиёт аз самтҳои ояндадори ҳамкорӣ байни ду давлат маънидод гардид.

Таъкид карда шуд, ки Тоҷикистон ва Қазоқистон дар баррасии масъалаҳои обу иқлим ва истифодаи оқилонаи захираҳои обии минтақа ба таври самарабахш ҳамкорӣ менамоянд.

Дар идома ҷонибҳо ба масоили вобаста ба тавсеа ва густариши робитаҳои фарҳангиву гуманитарӣ, бахусус маориф, илм ва фарҳанг таваҷҷуҳи хос зоҳир намуданд. Баргузории Рӯзҳои фарҳанг ва ташкили ҳамоишҳои муштараки илмию амалӣ ва фарҳангӣ муҳим арзёбӣ шуд.

Вобаста ба масъалаҳои мубрами рӯзномаи ҷаҳонӣ ва минтақавӣ табодули афкор анҷом ёфта, ҷонибҳо аз идомаи ҳамкории созандаи ду давлат дар самти таҳкими сарҳадот ва муқовимати муштарак бар зидди таҳдиду хатарҳои фаромиллӣ ҷонибдорӣ карданд.

   

Дар доираи сафари расмӣ ба Ҷумҳурии Қазоқистон Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Президенти Ҷумҳурии Қазоқистон муҳтарам Қосим-Жомарт Токаев мулоқот анҷом доданд.

Дар оғози мулоқот муҳтарам Рустами Эмомалӣ паёму таманниёти гарму самимии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро ба Президенти Ҷумҳурии Қазоқистон муҳтарам Қосим-Жомарт Токаев расонданд.

Зимни мулоқот маҷмуи масъалаҳои муносибатҳои дуҷонибаи Тоҷикистон ва Қазоқистон мавриди баррасӣ қарор дода шуд.

Аз ҷараёни рушди бемайлони тамоми ҷанбаҳои муносибатҳои дӯстию ҳамкории пурсамари Тоҷикистон ва Қазоқистон, аз ҷумла густариши робитаҳои созандаи байнипарламентӣ изҳори қаноатмандӣ карда шуд.

Ҷонибҳо ба масоили рушди муносибатҳои ду давлат дар бахшҳои сиёсӣ, иқтисодӣ ва фарҳангию башардӯстӣ таваҷҷуҳи хосса зоҳир намуданд.

Густариши ҳамкорӣ дар соҳаҳои ояндадори иқтисод, ба монанди саноат, энергетика, дорусозӣ, бахши кӯҳӣ ва агросаноатӣ, инчунин маориф, илм, фарҳанг ва сайёҳӣ зарур шуморида шуд.

Масъалаҳои байналмилалӣ, хоссатан таъмини амнияту субот дар митнақа аз ҷумлаи мавзуъҳои дигари музокирот буданд.

Пас аз анҷоми мулоқот дар қасри Акорда маросими сарфарозгардонии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо мукофоти давлатии Ҷумҳурии Қазоқистон баргузор гардид.

Барои саҳми арзанда дар таҳкими муносибатҳои дӯстӣ ва стратегии Ҷумҳурии Тоҷикистон ва Ҷумҳурии Қазоқистон, аз ҷумла густариши муносибатҳои байнипарламентӣ Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Ордени «Дустӣ», дараҷаи 2 сарфароз гардонида шуданд.

Мукофоти давлатиро ба муҳтарам Рустами Эмомалӣ Президенти Ҷумҳурии Қазоқистон муҳтарам Қосим-Жомарт Токаев тақдим намуда, саҳми арзандаи Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанберо дар густариши муносибатҳои неку ҳамсоягии ду кишвари дӯсту бародар таъкид кард.

Раиси шаҳри Душанбе муҳтарам Рустам Эмомалӣ аз қадрдонӣ ва сарфароз гардонидан бо мукофоти давлатии Ҷумҳурии Қазоқистон ба Президенти Ҷумҳурии Қазоқистон муҳтарам Қосим-Жомарт Токаев миннатдории самимӣ баён намуданд.

Дар доираи сафари расмӣ ба Ҷумҳурии Қазоқистон Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар шаҳри Остона бо фаъолияти технопарки байналмилалии Астана Хаб (Astana Hub) шинос шуданд. 

Иттилоъ дода шуд, ки Астана Хаб яке аз калонтарин технопарки байналмилалии стартапҳои иттилоотию технологӣ (IT) дар Осиёи Марказӣ ба ҳисоб меравад. Технопарки мазкур соли 2018 бо мақсади дастгирӣ ва рушди ширкатҳои технологии Қазоқистон ва кишварҳои хориҷӣ таъсис ёфта, ба фароҳам овардани шароити мусоид барои татбиқи фаъолияти инноватсионӣ дар соҳаи технологияҳои иттилоотию коммуникатсионӣ нигаронида шудааст.

Бояд тазаккур дод, ки ки моҳи июли соли 2025 бо ташаббуси навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон Қатъномаи Маҷмаи Умумии Созмони Милали Муттаҳид «Нақши зеҳни сунъӣ дар фароҳам овардани имконоти навин барои рушди устувор дар Осиёи Марказӣ» қабул шуд, ки ба ҳайси аввалин ҳуҷҷати байналмилалӣ ба раванди татбиқи зеҳни сунъӣ дар сатҳи минтақавӣ таваҷҷуҳ медиҳад.

Ин ташаббус имкон медиҳад, ки тавассути истифодаи самарабахши технологияҳои рақамӣ ва зеҳни сунъӣ заминаҳои муносиби ноил гардидан ба Ҳадафҳои рушди устувор фароҳам оварда шаванд.

Дар робита ба ин, Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ омӯзиши фаъолияти босамар ва таҷрибаи технопарки Астана Хаб-ро дар ин самт муфид арзёбӣ намуданд.