21-уми августи соли 2025 дар Агентии авиатсияи граждании назди Ҳукумати Ҷумҳурии Тоҷикистон бо иштироки васеи кормандон ҷиҳати амалӣ намудани Низоми ягонаи гардиши ҳуҷҷатҳои электронӣ (edo.innovation.tj) ҷаласаи назоратии назди директори Агентӣ Назарзода Ҳабибулло баргузор гардида, таъкид ба амал оварда шуд, ки бо мақсади таҳкими ҳукумати электронӣ ва баланд бардоштани сатҳи идоракунии муосир, гардиши ҳуҷҷатҳо дар Агентии авиатсияи гражданӣ бо низоми мазкур пурра ба роҳ монда шудааст. Ба масъулин дастур дода шуд, ки омӯзиши тартиби дурусти истифода ва кор бо низоми мазкурро мукаммалтар ба роҳ монанд. Инчунин, барои сари вақт иҷро намудани дастуру супоришҳо бо риояи талаботи низоми электронӣ дастурҳои мушаххас дода шуд. Аз ҷониби Агентӣ барномаи худкори назоратӣ ва системавӣ таҳия гардида, дастрасии сертификатҳо-иҷозатномаҳоро ба корхонаҳои авиатсионӣ, мутахассисони соҳа ва таҷҳизотҳои авиатсионӣ ба роҳ мемонад.

***

21-уми августи соли 2025 дар бинои Агентии авиатсияи граждании назди Ҳукумати Ҷумҳурии Тоҷикистон вохӯрии Сафири навтаъини фавқуллода ва мухтори Ҷумҳурии Мардумии Чин дар Ҷумҳурии Точикистон муҳтарам Го Ҷитзюн бо роҳбарияти Агентии авиатсияи гражданӣ Назарзода Ҳабибулло баргузор гардид. Дар рафти вохӯрӣ ҷонибҳо масъалаи тақвияти ҳамкориҳоро дар рушди соҳаи авиатсияи гражданӣ, кушодани парвозҳои мустақим дар самти Душанбе – Сиан ва Душанбе – Гуанджоу инчунин, мукаммал намудани парвозҳоро дар самтҳои Душанбе – Урумчӣ ва Душанбе – Пекин баррасӣ намуданд. Ҳамзамон, дар раванди вохӯрӣ таъкид гардид, ки ҷиҳати такмил додани дараҷаи касбии мутахассисони соҳаи авиатсияи гражданӣ, баргузории курсҳои омӯзишӣ дар мавзӯи бехатарии парвозҳо ва бехатарии авиатсионӣ табодули таҷрибаро боз ҳам васеътар гардонанд.

***

Дар Фурудгоҳи байналмилалии Дубай системаи нави “red carpet” ба истифода супорида шуда, ки тавассути технологияи зеҳни сунъӣ шахсияти мусофиронро санҷида вақти онҳоро сарфа менамояд. Сиситема дар айни замон он метавонад дар як вақт ба даҳ нафар мусофир хизмат расонад.

***

Ширкати “Airbus” бастаи хизматрасонии “Entry to Service (EIS)”-ро барои ҳавопаймои Airbus A220 таҳия намуд, ки интиқоли ҳавопаймоҳоро содда менамояд. Хизматрасонии “EIS” ба ширкатҳои ҳавопаймоӣ дар таҳия ё мутобиқ намудани стратегияи хизматрасонии техникӣ ва идоракунии парвозҳо кумак менамояд.

***

Тибқи иттилои расонаҳои соҳа, Ҷумҳурии Мардумии Чин бо мақсади харидории 500 адад ҳавопаймо бо ширкати “Boeing” созишнома имзо намуд.

***

Аз 2-юми феврали соли 2026 ширкати “easyJet” парвозро дар масири нав аз Глазго ба Фиумисинои Рум оғоз менамояд.

***

Ширкатҳои “China Airlines” ва “Southwest Airlines” Созишномаи ҳамкориро имзо намуданд, ки дар доираи он шарикии ширкатҳо васеъ гардида, хизматрасонӣ тавассути панҷ маркази калидии Ғарб, аз ҷумла Лос-Анҷелес (LAX), Онтарио (ONT), Сан-Франсиско (SFO), Сиэтл (SEA) ва Финикс (PHX) роҳандозӣ мегардад.

***

19-уми августи соли 2025 ҳукумати Латвия ва гурӯҳи “Lufthansa” барои ширкати миллии ҳавопаймоии “airBaltic” дар маҷмӯъ 28 миллион евро сармояи ҷубронпулӣ ҷудо намуданд.

***

Дар асоси шартномаи фурӯш ва иҷора бо ширкати “Avolon” ширкати “Virgin Australia” аввалин шаш адад ҳавопаймои Boeing 737-8 MAX-ро дастрас намуд.

***

Ифтитоҳи парвозҳои мустақим миёни Минск ва Теҳрон дар вохӯрии сарони давлатҳои Ҷумҳурии Исломии Эрон ва Ҷумҳурии Беларус баррасӣ гардид.

***

Бинобар корҳои таъмири хатти парвозу фуруд дар фурудгоҳи байналмилалии Остона, ки аз 1-уми сентябр то 31-уми октябри соли равон амалӣ мегардад, ширкати “Air Astana” ба ҷадвали парвозҳо тағйирот ворид намуда, мусофиронро аллакай огоҳ намуд. Тағйирот парвозҳои дохилӣ, инчунин парвозҳои байналмилалӣ, аз ҷумла ба Франкфурт, Дубай, Сеул, Истанбул, Анталия, Пекин, Пхукет ва Нҳа Трангро дар бар мегирад.

***

Департаменти авиатсияи Орегон бо ширкати Япония “Yamaha” барои омӯхтани таҳия ва ҷорӣ намудани чархболҳои бесарнишин Ёддошти тафоҳумро имзо намуд, ки имкони истифодаи ин чархболҳо дар манотиқи дурдаст нигаронида шуда, дар мубориза бо сӯхторҳои ҷангал истифода мешаванд. Иқдом мазкур нишон медиҳад, ки усулҳои анъанавӣ дигар метавонанд самаранок набошанд.

***

(Манбаъ: Агентии авиатсияи граждании назди Ҳукумати Ҷумҳурии Тоҷикистон, Aviation Explorer, Aviation Source News, Simply Flying,)